💥चंग री धमाल💥

💥चंग री धमाल💥

प्रीतम आजा रे मंगरा-मंगरा पर बाट निहारूं रे।

प्रीतम आजा रे ••• •••• ••••••••।

ऐ परभात्या चिडकोल्या बोले,मनडो लेय हिलोरा रे-2

काम-धाम की सुध-बुध खोई,बाट निहारूं रे।

प्रीतम आजा रे — ——- —–।।१।।

हाँ-हाँ रे प्रीतम आजा रे ।

ऐऽऽऽ रोटी भी पोऊं तो प्रीतम,आडी-टेडी आवे रे-2

छूला में बळीतो भूलूँ,बेलण बळज्या रे।

प्रीतम आजा रे———— ।।२।।

हाँ-हाँ रे प्रीतम आजा रे।

आँखड़ल्यां रा आँसू टप-टप,टपकण लाग्या गाला प-2

चूँदड़ भीजी अंगरखी सारी,थर-थर काॅंपू रे।

प्रीतम आजा रे—————-।।३।।

हाँ-हाँ रे प्रीतम आजा रे।

सूरज ढळतो-ढळतो देखूॅं,आथूणीं थारी बाठड़ली-2

झालर शंख नगाड़ा बाजे,म्हारी फाटे छातड़ली।

प्रीतम आजा रे——————।।४।।

हाँ-हाँ रे प्रीतम आजा रे।

चंग री धमाल म्हारे,काळज्या में गूंजे रे-2

पिचकारी री धार लागै,काया थर-थर कांपै रे-२

प्रीतम आजा रे—————–।।५।।

हाँ-हाँ रे प्रीतम आजा रे।

गाला प गुलाल म्हारे,भरे चूंगट्या भारी रे-2

होटा ऊपर लाली म्हाने सरम्यां मारै रे।

प्रीतम आजा रे—————।।६।।

हाँ-हाँ रे प्रीतम आजा रे।

सैजां ऊपर रात चाॅंदणी,म्हाने खाबा दौड़े रे-2

खाऊॅं मरौडा़ आडा-टेडा,बळै कळौटां रे।

प्रीतम आजा रे—————–।।७।।

हाँ-हाँ रे प्रीतम आजा रे।

सूनी-सूनी रातां लागे,फटे काळज्यो भारी रे-2

बाट जोहती तड़पै आँख्यां,मुरझण लागी रे।

प्रीतम आजा रे—————।।८।।

हाँ-हाँ रे प्रीतम आजा रे।

नागण सी या म्हारी चौटी,लेय लपेटा भारी रे-2

डीलड़ा प डसती रहवै,थर-थर कापूं रे।

प्रीतम आजा रे—————।।९।।

हाँ-हाँ रे प्रीतम आजा रे।

जौबन बीत्यो जावे निश-दिन,काया ढळती जावे रे-2

हाडड़ल्या निकळ्या सारा,पड़े लूंदड्या रे।

प्रीतम आजा रे————।।१०।।

हाँ-हाँ रे प्रीतम आजा रे।

आस छौडद्यूॅं काॅंई थारी,प्राण छूट्या जावे रे-2

सांसाॅं रुक-रुक आवण लागी,नहीं भरोसो रे।

प्रीतम आजा ज्यो———।।११।।

हाँ-हाँ रे प्रीतम आजा ज्यो।

हाँ-हाँ रे प्रीतम आजा रे।।।।।

‘नायक’ बाबूलाल नायक

(व्याख्याता)

राजकीय उच्च माध्यमिक विद्यालय

खरेड़ा, टोडारायसिंह

टोंक